意外來的時陣-北港朗讀跟念練習-20181106

107上北港校內朗讀比賽文章

創作及拼音加註：廖崇仁20180925

    各位評判（pīng pùan）老師、各位同學，逐家好！（鞠躬行禮）我是第（xx）號，今仔日我欲（bheh）朗讀个（ē）題目是：「意外來的時陣。」

    人生在世無才調掛無事牌，無遐（hia沒有那麼...）好康逐項代誌攏順序，俗語講：「牛有料，人無料。」以早的人牽牛拖車，叫牛往東就往東、往西就往西，這是會當家己作主、料想會到的。毋過，人間世事會發生一寡（zit gua一些）意外，當時會來咱總是想袂著，「人無料」就是咧講咱人無法度料想家己未來的路會按怎啦！

    會記得頂學期坐我隔壁的阿勝，放學定定攏會佇球埕拍一時仔籃球。伊的身軀勇壯扭掠（liu-liah形容手腳快、動作敏捷），籃球拍甲真順手。哪知佇伊欲參加校外一項重要比賽的進前工，佮同學咧拍籃球，想袂到阿勝傷過靠勢（siūn gùe kòr se太過於仗勢）家己的跤手緊，無張持（diun-dĭ也是小心注意）煞去予同學用球挵著伊的目睭，差一險仔就青盲（cēn-mĕ眼瞎）！自按呢無法度參加隔轉工的比賽。阮老師閣刁工講這个例，來提醒同學著愛細膩（sè-lī/rī也是小心注意），毋通「目睭看佇粿，跤底踏著火。」不管時愛有「危機意識（ūi-gī-ì-sīk）」！

    猶閣有，我聽阮六年仔小學的台語老師，講伊家己細漢的故事。伊讀五年仔的時，有一擺放學轉到厝，冊包擲咧（dan leo丟著）就趕出去佮囡仔伴耍。伊目睭看塗跤，用浪的（lōng ē也是跑的意思）走出去巷仔口的車路，佳哉想著無紮物件（bhōr zà mih-giān未帶東西）雄雄停跤，才無去予兵仔車軋著（gāuh-diorho輾到），若毋是按呢，這馬就無伊這个老師矣。

    意外來的時陣，咱因為心思無想到遐，往往攏無才調（zāi-diau能力）應付，所以佇平常時仔就愛培養家己的應變能力，不管時愛有較冗剩（liong-siōng寬裕）的準備，應付無張持會出現的危險，俗語講：「好天愛積（zik）雨來糧」嘛是這个意思，按呢就會當共意外出現的危險降低，較袂嚴重傷害著家己啦！

    我个朗讀到遮（zia）結束，多謝逐家！（600字3分11秒）